@dritanalsela

PRINDËR, INFORMOHUNI PARA SE TË PRANONI KËTË SISTEM NË SHKOLLAT E FËMIJËVE TUAJ! Këtu nuk po flasim për disa kamera të zakonshme sigurie. Po flasim për kamera inteligjente, të lidhura me Inteligjencën Artificiale, Qendrën Kombëtare të Monitorimit dhe Policinë e Shtetit, të cilat analizojnë pamjet në kohë reale. Sot kanë filluar me 20 shkolla, ndërsa Rama ka thënë qartë se ky është vetëm fillimi dhe se projekti do të vazhdojë “shkollë pas shkolle”. Para se ta pranoni këtë në emër të “sigurisë”, kërkoni përgjigje. Çfarë analizon saktësisht Inteligjenca Artificiale? A përdoret njohja e fytyrës dhe, nëse jo sot, kush garanton që nuk aktivizohet nesër? A mund të ndiqet një fëmijë nga një kamerë tek tjetra? A analizohet sjellja e tij? Çfarë të dhënash krijohen dhe sa kohë ruhen? Ku ndodhen serverët? Kush ka akses: shkolla, policia, qendra e monitorimit apo kompania private? Kush kontrollon ata që kontrollojnë fëmijët tanë? Dhe çfarë e pengon një qeveri që nesër ta përdorë të njëjtën infrastrukturë për një qëllim tjetër? Privatësia nuk është luks, sidomos kur bëhet fjalë për fëmijë. Një fëmijë është i detyruar të shkojë në shkollë. Ai nuk mund të thotë: “Nuk dua të monitorohem, prandaj nuk hyj.” Pikërisht për këtë arsye prindërit kanë përgjegjësi të kërkojnë garanci të forta për privatësinë, të dhënat personale dhe kufijtë e këtij sistemi. Mos ia dorëzoni fëmijën tuaj një sistemi shtetëror monitorimi me një çek të bardhë vetëm sepse mbi të është shkruar “siguri”. Siguria është e rëndësishme, por ajo nuk i jep as Ramës, as policisë dhe asnjë qeverie të drejtën të bëjë çfarë të dojë me të dhënat dhe privatësinë e fëmijëve tanë. Kërkoni transparencë. Kërkoni dokumentet. Kërkoni të dini cilat funksione janë aktive, kush i sheh të dhënat, sa kohë ruhen dhe cilat funksione janë të ndaluara me ligj. Derisa këto pyetje të marrin përgjigje të qarta dhe të verifikueshme, prindërit kanë çdo arsye të kundërshtojnë zgjerimin e këtij sistemi. Fëmijët nuk janë pronë e shtetit. Dhe siguria e tyre nuk duhet të bëhet arsye për t’ua hequr privatësinë.

On the profile · Sep 1, 2026